postquam ergo audierunt omnes reges Amorreorum qui
habitabant trans Iordanem ad occidentalem plagam et cuncti
reges Chanaan qui propinqua possidebant Magno mari loca quod
siccasset Dominus fluenta Iordanis coram filiis Israhel donec
transirent dissolutum est cor eorum et non remansit in eis
spiritus timentium introitum filiorum Israhel
eo tempore ait Dominus ad Iosue fac tibi cultros lapideos et
circumcide secundo filios Israhel
fecit quod iusserat Dominus et circumcidit filios Israhel in
colle Praeputiorum
haec autem causa est secundae circumcisionis omnis populus
qui egressus est ex Aegypto generis masculini universi
bellatores viri mortui sunt in deserto per longissimos viae
circuitus
qui omnes circumcisi erant populus autem qui natus est in
deserto
per quadraginta annos itineris latissimae solitudinis
incircumcisus fuit donec consumerentur qui non audierant vocem
Domini et quibus ante iuraverat ut ostenderet eis terram lacte
et melle manantem
horum filii in locum successerunt patrum et circumcisi sunt
ab Iosue quia sicut nati fuerant in praeputio erant nec eos in
via aliquis circumciderat
postquam autem omnes circumcisi sunt manserunt in eodem
castrorum loco donec sanarentur
dixitque Dominus ad Iosue hodie abstuli obprobrium Aegypti a
vobis vocatumque est nomen loci illius Galgala usque in
praesentem diem
manseruntque filii Israhel in Galgalis et fecerunt phase
quartadecima die mensis ad vesperum in campestribus Hiericho
et comederunt de frugibus terrae die altero azymos panes et
pulentam eiusdem anni
defecitque manna postquam comederunt de frugibus terrae nec
usi sunt ultra illo cibo filii Israhel sed comederunt de
frugibus praesentis anni terrae Chanaan
cum autem esset Iosue in agro urbis Hiericho levavit oculos
et vidit virum stantem contra se et evaginatum tenentem gladium
perrexitque ad eum et ait noster es an adversariorum
qui respondit nequaquam sed sum princeps exercitus Domini
et nunc venio
cecidit Iosue pronus in terram et adorans ait quid dominus
meus loquitur ad servum suum
solve inquit calciamentum de pedibus tuis locus enim in quo
stas sanctus est fecitque Iosue ut sibi fuerat imperatum
